قصيدة (( ثورة إمرأه )) من ديوانى الثانى .. ------- الشاعرة .. إيزيس غانم ...

قصيدة (( ثورة إمرأه ))
من ديوانى الثانى ..
----------------------
الليل وأنا ...ف إنتظار الحلم ..
كأنى والليل ..شركاء ف حلمك..
لو خدتنى الغفوه لحظه..
تهتف نجومه ف سمعى ..أصحى ..!!
كأنه عاشق زيى حلمك..!
ولسه فاكر لما كنا ...
بين نداه..بننام ونصحى ...
شوفت حد ف حلمه شارك ليل معاه؟؟
شوفت ليل عاشق وعشقه منه تاه..؟
توهنى عشقك...توهنى ليلك..
وكأن قلبك...
فارس بيسحب أسراه وراه...!
وأنا جوه أسرك ..عصفور صغّير
عصفور بيحبى ...
لسّه ريشهُ ف مبتداه..!!
قمم الجبال والتلج ورزاز البّرد..
محتاج لريش ..مينتنيش ...
وإن واجهه ريح ...
ف مواجهة الريح ينفرد..!!
ف إزاى وأنا بحبى بجراحى ..
هقدر أواجه ثورتك...؟
هقدر أفادى حربتك..؟
هقدر أخرّج من بين ضلوعك
كل عاشقه عشقتك ..؟
وأنا دمى نازف م الجناح..!
يا هارون ..رشيدك مش رشيدى ..
أنا لما أحب ......
أحب قلبى يكون ف إيدى ..!!!
وإن وهبتك جزء منه...
تحمد العالى ف سماه ...!!
-------------------------------
إيزيس غانم ...