فينــــــــــــــك بنــــــــــى الخطــــــــــــــــاب... ــــ الشاعرة / إيزيس غانم

فينــــــــــــــك بنــــــــــى الخطــــــــــــــــاب...
ــــــــــــــــــــــــــــــــــــــــــــــــــــــــــــــــــــــــــ
لما إبتدت إيد النهار ...
تلمّ شعر الشمس ..
من فوق الجدار ...!!
والبياعين إبتدوا..
يغطوا أسبات ..
الفواكه والخضار ..
كانوا ولاد الجوع...
الفقرا الصغار..
مستنيين حامض بلح..
بطيخ وقع ع الأرض..
بيّاعه سابه للتراب...!!
والجوع ما فرق يوم مابين ..
جعان بيبكى ...
أو كلب من جوعه نبح ..
بين الكلاب...!!
السوق بيقفل ..والعيال بتلم..
بواقى حامض ...عمره ما يتلم..!!
وأنا بين دموع الغلابه بصّه باستغراب ..
تسألنى نفسى ...
وترد نفسى ..على نفسى ..
ليه ميزان العدل واقع ..؟
وليه مازال على أرض بلدى ..
عريان بيبكى ..
وغيره متلفع بميت جلباب ...!!
فينك عمر..؟فينك بنى الخطاب..؟
العدل بعدك إندثر..
والظلم ..مارد..واقف يسنّ نياب..!!
وللأسف..كل الأسف..
نابه ما ينهش...
غير اللى ...ملهوش ...باب ..!!
*****************************

\\من ديوانى الثانى \\
\\ إيزيس غانم \\