طـَعــــــم العِــــــــيد ......!!!!الشاعر رفعت ابو العلا

طـَعــــــم العِــــــــيد ......!!!!
...................................
طعم العيد السنه دِي .......
زَي الحاجَه اللّي ....
ناقصه حاجَه
حتى الفرحه السنه دي ....
فرحة الناس المِحتاجه
فيه ناس .. مِحتاجه فَرْحه
من كُتر الحُزن اللّي جُوّاها
ناسيه العيد ...
في همومها سارحه ،
وناسيه الدنيا ، وبَهاها
وناس .... ناسيه الناس ،
وناس ... الدنيا ناسياها !!
فيه ناس .. محتاجه أمان
ضحايا إرهاب الحروب
هجروا بيوت ، وأوطان ..
عايشين حياتهم ... ( هروب )
وفيه ناس .. محتاجه بُكره ..
ييجي محقَّق أماني ،
وفيه ناس .. راضيه ، وشاكره
وتِفْرح ... حتى ف ثواني
وفيه ناس .. زي الغريب ..
يكتِم فرحِتُه جُوَّاه
مستني ييجي الحبيب ،
وتِكْمَل فرحِته ويّاه
وفيه ناس .. زي شمعه
بنورها .. تِمحي الضباب
بتضحك .. وف عينيها دمعه
فاكره حبيبها اللّي غاب
وفيه ناس ..
زيي ... مِحتاره ...!!
تِحْزَن ، والاّ تِفْرَح ؟؟؟
تايه ... ف دنيا دوّاره ...
ومش لاقيلي ...
فيها مَطْرَح
أضحك ، والاّ أبكي ؟
ولمين ...
لهمومي أشرح ؟؟
وييجي العيد .. كل مرّه ..
بحر ... مشاعره هيّاجه
ويرمي ... كل همومنا بَرّه ،
وهوّه ... زي المَهراجا ...
كل م ييجي ... يرمي لنا سرّه
فَرْحَه بس ... ناقِصها حاجه .... !!!

...........................................
الشاعر رفعت ابو العلا

أعجبني

تعليق

م